அன்புடையீர்!
எல்லாம்வல்ல இறைபரம்பொருளின் அருளாலும் ஸ்ரீகாஞ்சி மாமுனிவர் குருவருளாலும் அனைவருக்கும் நலமே விளைக! வருகின்ற 22.03.2020 ஞாயிற்றுக்கிழமை நாள்முழுவதும் கொரோனா தடுப்பு முயற்சியாக சுயகட்டுப்பாட்டுடன் அனைவரும் அவரவர் இல்லங்களில் இருக்க நமது பாரதப்பிரதமர் ஸ்ரீ.மோதிஜி அவர்கள் அறிவித்துள்ளார்கள். புனிதமான நமது பாரதபூமியில் கொடிய நோய்கள் அண்டாமல் இருக்கவும் நமது மக்களின் நலனில் அக்கறையோடு மத்திய மாநில அரசுகள் எடுத்துவரும் முயற்சிகளுக்கு முழுமையாக நாம் ஒத்துழைப்பு தரவேண்டியது நமது தார்மீகக்கடமையாகும்.அன்றைய நாளில் காலை எட்டு மணியிலிருந்து எட்டரை மணிவரை அவரவர் இல்லங்களிலேயே குளித்து பூஜையறையில் அல்லது சுத்தமான இடத்தில் அமர்ந்து இஷ்ட தெய்வங்களை, ஸ்ரீகாஞ்சி மஹாபெரியவரை மற்றும் நம் பாரதத்தின் புனித மஹான்களை மனதால் வணங்கி, ஸ்ரீவிஷ்ணு ஸஹஸ்ரநாம பாராயணம், ஹனுமான் சாலீசா பாராயணம் செய்ய வேண்டுகிறோம். இந்த ஸ்லோகங்கள் சொல்லி பழக்கமில்லாதவர்கள் புனிதமான சிவ நாமத்தையோ அல்லது ராம நாமத்தையோ ஜபம் செய்யவும் ஸ்ரீகந்தர் சஷ்டிக்கவசம், தேவாரத்தில் நோய் தீர்க்கும் பதிகங்கள், கோளறு பதிகம் பாராயணம் செய்ய வேண்டுகிறோம். ஒரே நேரத்தில் காலை எட்டு மணியிலிருந்து எட்டரை மணிவரை உலக நலன் வேண்டி இந்துசமயமன்றம் மற்றும் ஸ்ரீகாஞ்சி கைங்கர்யசபா அன்பர்கள் மற்றும் தெய்வீகப்பற்றுடைய அன்பர்கள் அனைவரும் ஒருசேர ப்ரார்த்தித்து கொடிய நோய் சவாலை எதிர்கொண்டு முறியடிப்போம்.
பல ஆயிரம் மைல்தாண்டி வேறுநாடுகளில் வாழ்ந்துவரும் நம் நண்பர்கள், உறவினர்கள், சகோதர சகோதரிகள் நலமாக வாழ ப்ரார்த்திப்போம்.
இந்த இக்கட்டான சூழ்நிலையில் மக்கள் நலன் சார்ந்த பணிகளில் தங்களை ஈடுபடுத்தி அயராது உழைக்கும் மருத்துவர்கள், மருத்துவ பணியாளர்கள், தூய்மைப்பணியாளர்கள்,சுகாதாரத்துறை ஊழியர்கள், காவல்துறையினர்,மக்கள் நலப்பணியாளர்கள், தன்னார்வ தொண்டர்கள், அரசு ஊழியர்கள், அரசுப்பிரதிநிதிகள் அனைவரின் நலமான வாழ்விற்கும் ப்ரார்த்தனை செய்வோம்.ஸ்ரீகாஞ்சி யின் கருணைத்தெய்வம் மஹாஸ்வாமிகள் மற்றும் ஸ்ரீஆசார்ய ஸ்வாமிகளின் அனுக்ரஹம் அனைவருக்கும் கிடைக்க இந்துசமயமன்றம் ஹ்ருதயபூர்வமாக ப்ரார்த்தனை செய்கிறது.
“வாழ்க வையகம் வளமுடன் நலமுடன் “
அன்புடன்,
புலவர் க ஆத்ரேய சுந்தரராமன்,
கௌரி வெங்கட்ராமன்.
மாநில அமைப்பாளர்கள்,
ஸ்ரீகாஞ்சி காமகோடி பீடத்தின் சமயச்சேவை அமைப்பான
இந்துசமயமன்றம்.